❌ما تتجوزيش لمجرد إنك عاوزه تلبسي فستان الفرح .. بصرف النظر عن الشخص اللي هيقف جنبك .. إنتي كده بتتجوزي هيكل بشري خارجي .. ممكن تتفاجئي باللي جواه بعد كده.
❌ما تتجوزيش لمجرد إنك عاوزه تخرجي من بيت أهلك وتحسي بحريتك … اختاري انتي رايحة فين ومع مين الأول
❌ما تتجوزيش لمجرد إن معظم أصحابك اتجوزوا … وشكلك قدامهم ايه .. ونظراتهم ليكي عامله ازاي
❌ما تتجوزيش لمجرد إن سنك كبر وأهلك بدأوا يقلقوا .. وقطر الجواز هيفوتك والمجتمع اللي بيدبح …. ما حدش في كل دول هينفعك وانتي دمعتك علي خدك كل ليلة نتيجة سوء الاختيار
❌ما تتجوزيش وانتي متخيلة ومتصورة إن جوزك هو المُخلِّص والمُنقذ ومحقق الأحلام … أحلامك انتي اللي بتصنعيها وانتي اللي بتجري وراها وانتي اللي بتحققيها .. هو فقط رفيق في الرحلة
❌ما تتجوزيش وانتي ناوية تتنازلي عن أي حاجة .. أو تضحي بأي حاجة أو تدفعي أي تمن … ما تصدقيش اللي يقولك الحياة الزوجية تنازل وتضحية ( بترسي علي الزوجة في الآخر ) .. الحياة الزوجية مشاركة ومسؤولية .. والفرق بين التنازل والمشاركة كبير وبين التضحية والمسؤولية أكبر.
❌ما تتجوزيش حد ناوي يفصلك علي مقاسه .. اللي قابلك زي ما انتي أهلاً وسهلاً .. اللي عاوز مواصفات تانيه .. يدور عليها في حد غيرك
❌ما تتجوزيش واحد فيه حاجات مش عجباكي وتقولي : هغيره بعد الجواز
احنا مش بنتجوز علشان نغير بعض .. مش بنتجوز علشان نعالج بعض .. مش بنتجوز علشان نربِّي بعض
❌ما تتجوزيش واحد تدوري فيه علي أب وما تتجوزيش حد بيدور علي أم تتبناه مش زوجة تعيش معاه
📌اللي عاوز خدامة يدور علي خدامة واللي عاوز مربية يدور علي مربية
اللي عاوز شريكة حياة أهلاً وسهلاً
ده الأسباب الشائعة لزواج أغلب الإناث التي ذكرها د. محمد طه بكتابه لا #بطعم_الفلامنكو
لإني لن أكتبها بنفس ما ذكرها
فإذا كانت هذه أسبابك لا تتزوجي وإذا كنت متزوجة فمن المؤكد أنك تحاولين التغيير ففكري في الحلول ولا تركزي علي المشاكل لكي تضمني نجاح الزواج وعدم فشله